உலகளாவிய மாநாடுகள்: மானிடத்தின் மேலான நலனுக்குப் பாடுபடுதல்


BAHÁ’Í உலக மையம், 18 மார்ச் 2022, (BWNS) – உலகளாவிய மாநாடுகளின் அலை உலகம் முழுவதும் தொடர்ந்து பரவி வருவதால், அதிகமான மக்கள் ஒற்றுமையை வளர்ப்பதற்கான சாத்தியக்கூறுகள் மற்றும் தங்கள் அண்டை மற்றும் பிற சக குடிமக்களுடன் இணைந்து தங்கள் சமூகத்திற்குச் சேவையாற்றுவதற்கான சாத்தியக்கூறுகளின்பால் விழிப்புற்று வருகின்றனர்..

இந்த மாநாடுகளில் பங்கேற்பாளர்கள்–அவற்றில் பெரும்பாலானவை அடித்தட்டு அளவில் நடைபெறுகின்றன–ஒரே அலகென அவர் விவரித்த மானிட உலகம் பற்றிய பஹாவுல்லா தொலைநோக்கினுடைய வெளிப்பாட்டை உறுதியான வடிவத்தில் காண்கிறார்கள். ஒரு குடும்பம் – பின்வரும் மேற்கோளில்: “நீங்கள் அனைவரும் ஒரே மரத்தின் இலைகள், ஒரே கடலின் துளிகள்.”

ச்சாட் நாட்டில் நடந்த மாநாட்டில் பங்கேற்றவர்களிடையே இந்த ஒற்றுமை உணர்வு உணரப்பட்டது, இது தலைவர்கள் மற்றும் மதத் தலைவர்களை ஒன்றிணைத்து கூட்டு அமைதியை அடைய ஒவ்வொரு நபரும் எவ்வாறு பங்களிக்க முடியும் என்பதை ஆராய்வதற்காகும். “இந்த மாநாடுகள் எண்ணற்ற நெருக்கடிகள், வன்முறை இடையூறுகள் மற்றும் அநீதிகளை நன்கு அறிந்த ஒரு நாட்டில் அமைதியை ஸ்தாபிப்பதில் முக்கிய பங்கு வகிக்கும்” என கலந்து கொண்ட தலைவர்களில் ஒருவரான மஹாமத் ஹசானே கூறினார். அந்த எழுச்சியூட்டும் கூட்டத்தில், பங்கேற்ற முதல்வர்கள் அனைவரும் தங்கள் கிராமங்களில் இதுபோன்ற மாநாடுகளை நடத்த வேண்டும் என கோரிக்கை விடுத்தனர்.

இந்தியாவில், மகாராஷ்டிர மாநிலத்தில் உள்ள ஹிங்கன்வேதேயில் நடைபெற்ற மாநாட்டில் கலந்து கொண்டவர்கள், குடும்பங்களில் மது அருந்துவதால் ஏற்படும் பேரழிவை உண்டாக்கும் விளைவுகள் உட்பட பல்வேறு சமூகப் பிரச்சினைகளை எடுத்துரைத்தனர். மாநாட்டைத் தொடர்ந்து சுகாதார மேம்பாட்டு பிரச்சாரம் நடந்தது. ஒரு சர்பஞ்ச் (கிராமத் தலைவர்) ராஜு அர்ஜுன் தத்ரக் கூறுகிறார்: “இந்த மாநாடுகளை நாம் தவறாமல் நடத்துவது மிகவும் முக்கியம், ஏனென்றால் நாம் ஆராய்ந்து வரும் பஹாய் கொள்கைகள் எதிர்காலத்தை எவ்வாறு உருவாக்குவது என்பதற்கான புதிய கண்ணோட்டத்தை நமக்கு வழங்குகின்றன.”

இதற்கிடையில், ஐக்கிய அமெரிக்காவில் மண்டல ஒன்றுகூடல்களில் கலந்துரையாடல்கள் வரும் மாதங்களில் அந்த நாடு முழுவதும் நடத்தப்படும் நூற்றுக்கணக்கான உள்ளூர் கூட்டங்களுக்கு தளத்தை அமைக்கின்றன. அந்தக் கூட்டங்களில் ஆராயப்படும் கருப்பொருள்களில் மானிடத்தின் ஒருமைப்பாடு மற்றும் இன நீதி ஆகியவை அடங்கும்.

உலகெங்கிலும் உள்ள நாடுகளில் நடைபெற்ற சமீபத்திய மாநாடுகள் சிலவற்றின் படங்களைப் பார்க்க news.bahai.org- ஐப் பார்வையிடவும்.

கூடுதல் படங்களுக்கு: https://news.bahai.org/story/1587/

மூலாதாரம்: https://news.bahai.org/story/1587/

நவ்-ருஸ் தினம்


மார்ச் மாதம் 21-ஆம் தேதி உலகம் முழுவதுமுள்ள பஹாய்கள் தங்களின் வருடப்பிறப்பான நவ்-ருஸ் திருநாளைக் கொண்டாடவிருக்கின்றனர். பஹாய் சமயத்தின் இரட்டை அவதாரங்களான பாப் பெருமானார், பஹாவுல்லா இருவரும் பஹாய் சமயத்தின் புனித நாள்கள் ஒன்பதில் ஒன்றாக, நவ்-ருஸ் தினத்தையும் அங்கீகரித்து, அதனைக் கடவுளின் அதிபெரும் நாமத்துடன் தொடர்புபடுத்தினர். பஹாய் மாதமான பஹா மாதத்தின் முதல் நாளே நவ்-ருஸ் ஆகும். இந்த பஹா அல்லது பேரொளி என்பது கடவுள் நாமங்களுள் ஒன்றாகும்.

இந்த நவ்-ருஸ் எனப்படும் வருடப்பிறப்பானது ஒவ்வொரு வருடமும் மார்ச் மாதத்தில், இளவேனிற் காலத்தின் முதல் நாளில் கொண்டாடப்படுகின்றது. அஃதாவது, சூரியன் குளிர்காலத்தைக் கடந்து அதன் உச்சநிலைக்குச் சென்று, பகலும் இரவும் ஒரே அளவாக வரும், மகா விசுவதினம் எனப்படும் நாளில் கொண்டாடப்படுகின்றது. சூரியன் மேஷ ராசிக்குள் பிரவேசிக்கும் அத்தருணத்திற்கு ஏற்ப நவ்-ருஸ் புத்தாண்டு நிர்ணயிக்கப்படும். பஹாய் நாள்கள் சூரிய அஸ்தமனத்தில் ஆரம்பிக்கின்றதன் காரணமாக, சூரியன், அதன் அஸ்தமனத்திற்கு முன்பாக மேஷ ராசிக்குள் பிரவேசிக்கின்றதா அல்லது அதற்கு பிறகு பிரவேசிக்கின்றதா என்பதைப் பொறுத்து நவ்-ருஸ் பண்டிகை எந்த தேதியில் நிகழும் என்பது நிர்ணயிக்கப்படும். இதையே பஹாவுல்லா, “சூரியன் மேஷ ராசிக்குள் பிரவேசிக்கும் (மகா விசுவ) தினமே இவ்விருந்து (நவ்-ருஸ்) கொண்டாடப்பட வேண்டுமென விளக்குகின்றார் — இது சூரிய அஸ்தமனத்திற்கு ஒரு நிமிடம் முன்பாக நிகழ்ந்தாலும் சரி. ஆதலால், விசுவத்தின் நேரத்தைப் பொறுத்து நவ்-ருஸ் தினம் மார்ச் 20, 21 அல்லது 22-இல் நிகழலாம்.

நவ்-ருஸ் என்பதன் அர்த்தம் ‘புதிய நாள்’ என்பதாகும். இது ஆரம்பத்தில் பாரசீக மதமான பார்சி (Zoroastrianism) மதத்தில் அதன் மூலாதாரத்தை கொண்டிருப்பதன் காரணமாக இரானிய மக்களின் கலாச்சாரத்தில் அது வேரூன்றியுள்ளது. நவ்-ருஸ் பண்டிகை சில இடங்களில் சமய சார்பற்ற முறையிலும், சில இடங்களில் சமயம் சார்ந்த ஒரு பண்டிகையாகவும் கொண்டாடப்படுகின்றது. உதாரணத்திற்கு, பஹாய்களுக்கும், பார்ஸி மதத்தினருக்கும், சில இஸ்லாமிய பிரிவினருக்கும் நவ்-ருஸ் திருநாள் சமயம் சார்ந்த ஒரு பண்டிகையாகும். இவர்கள் தவிர்த்து, நவ்-ருஸ் பண்டிகை கடந்த 3,000 வருடங்களாக மேற்கு ஆசியா, மத்திய ஆசியா, கௌகசஸ், கறுங்கடல் பகுதி, பால்க்கன் பகுதிகள், தென் ஆசியா போன்ற இடங்களில் சமய சார்பற்ற முறையில் கொண்டாடப்பட்டு வருகின்றது.

பஹாய்கள் நவ்-ருஸ் தினத்திற்கு முன்பாக ஒரு பஹாய் மாதத்திற்கு (19 நாள்கள்) சூரியோதயத்திலிருந்து சூரிய அஸ்தமனம் வரை உண்ணா நோன்பிருப்பர். பஹாய்கள் இந்த உண்ணா நோன்பிருத்தலை, ஆன்மாவை பக்குவப்படுத்தும் ஒரு செயலாக மேற்கொள்கின்றனர். அஃதாவது, உணவு உண்ணாமல் இருப்பதை அன்மீக நோன்புக்கான ஒரு புறச் சின்னமாகக் கருதுகின்றனர். உடலியல் இச்சைகளிலிருந்து தங்களை விடுவித்துக்கொண்டு, தாங்கள் ஆன்மீகப் பிறவிகள் என்பதை ஞாபகப்படுத்திக்கொண்டு, கடவுளின் அண்மையை அடைய முயல்கின்றனர். இதன் மூலம் அவர்கள் தங்களை வரும் ஒரு வருடகாலத்திற்குத் ஆயத்தமாக்கிக்கொள்கின்றனர்.